Bólkur: Tíðindi

Prædika av Derhardi Jógvansyni í Argja kirkju 7. juli 2019.

Prædikan kann lesast við at trýsta á her.

Sunnudagin 9. juni var útferðin til Skótahúsið við Løkin. Dagurin byrjaði við familjugudstænastu, har Bergur D. Joensen var prestur. Gentukórið Døggdropar og klovnurin Bubu luttóku eisini. Eftir gudstænastuna var farið til Skótahúsið við Løkin, har døgurðin bíðaði. Borðreitt varð við stoktum marineraðum búffum, stoktum marineraðum høsnarungabringum, rómabakaðum eplum, salat, pylsum, og burgarum við tilhoyri. Tað smakkaði, sum vera man, sera væl og mett og væl sett bleiv gjørt klárt til eina postarenning.
Har vóru ymiskir postar at royna seg, so at øll sluppu at royna seg. Minustrúkari, leggja klæðini í eitt rað, vurderað vekt og longd á ymsum tingum, byggja lego, lata seg í stuttlig klæði, stápla bikar og ganga við bindi fyri eyguni gav alt mangar avbjóðingar, sum skuldu loysast í felag.
Drekkamuður var klárur, tá postarenningin var liðug, og eftir tað var ein spurnarkapping, har somu bólkar sum í postarenningini royndu seg.
Ein sera hugnaligur dagur, sum vit kunnu vera takksom fyri. Myndir av degnum kunnu síggjast við at trýsta á her!

Hvítusunnudag verður familjugudstænasta kl. 11.00 við Bergi D. Joensen, presti. Hetta verður ein eitt sindur øðrvísi gudstænasta, har klovnurin Bubu luttekur og gentubólkurin Døggdropar syngja.
Talvan gongur fyri Føroyska Bíbliufelagið.

Hetta er eisini dagurin, har sunnudagsskúlin fer sína útferð, og eins og í fjør gongur leiðin til Skótahúsið við Løkin. Vit vórðu sera heppin við veðrinum í fjør, har nógvar D-vitaminir komu innanbora gjøgnum dagin. Vit vóna, at veðrið verður gott, men húsið er stórt og praktiskt, so tað eru nógvir møguleikar, um veðrið verður keðiligt.

Vit fara at grilla døgurða, har øll eru vælkomin at luttaka. Allarbest er, um tit siga við onkran í sunnudagsskúlanevndini ella trýsta á “eg fari” í tiltakinum á Facebook, so at vit vita nøkunlunda, hvussu nógv koma at eta.
Umframt tað verður ymiskt til gaman og álvara og sjálvandi eru øll hjartaliga vælkomin!

Í vikuni fær Vesturkirkjan spennandi vitjan við dananum Peter Damgaard-Hansen. Hann er aut. psykolog og par-terapeutur.

Petur skrivar m.a.:

Skalt tú veruliga gera sátt krevst ein máttmikil og grøðandi tilgongdir, sum krevur arbeiði og økt sjálvsinnlit hjá báðum pørtum í ósemjuni. Eg leggi dent á sanna sáttargerð, og hvussu hetta kann gerast í roynd og veru.

Um Petur Damgaard-Hansen

Petur hevur arbeitt við menniskjum í fleiri enn 35 ár og er serfrøðingur í parterapi og sáttargerðar-arbeiði. Hansara fakliga tilgongd tekur støði í einum samspæli millum likamliga, sálarliga og andaliga heilsu.

Petur fer at hava hesar fyrilestrar í Vesturkirkjuni:

Mikukvøldið 22. mai kl. 19:30 – 21.30

Evnið: At gera sátt og semju í sambondum. Her verður hugsað um okkara relatiónir hvør við annan. Øll eru vælkomin.

Leygardagin 25. mai kl. 14:00 – 16:30

Evnið: Kynstrið at liva tað góða hjúnalagið. Her verður m.a. gjørt upp við skeivar væntanir, vit hava fyri hjúnalagið. Øll eru vælkomin.

Til ber at lesa meira um Peter Damgaard-Hansen á hesum heimasíðum:

Baggrund

Heftið ”Forsoningens pris” eftir Peter fæst fyri kr. 50,- og fyri trý hefti er prísurin kr. 100.

Tiltøkini eru ókeypis. Til ber at lata eina gávu.

VESTURKIRKJAN

v. Bergi D. Joensen, presti

Sunnudagin 5. mai kl. 17.00 verður familjumøti við Tóru Norðgerð úr Leirvík. Vit byrja við einum felags nátturðabita, so at vit eru væl fyri til at taka ímóti tí, sum vit fara at hoyra og syngja um.
Vit gleða okkum at síggja so mong sum gjørligt!
Øll eru hjartaliga vælkomin!

Leygardagin 16. mars kl. 13.00 skipaði sunnudagsskúlin á Argjum fyri loppumarknaði. Ágóðin fór til SIMBA-arbeiðið hjá Heimamissiónini. Tað er alt arbeiðið, sum hevur børn og familjur at gera.
Tað varð lýst við loppumarknaðinum í góðari tíð, og nógv brúktu møguleikan at stuðla við ymsum lutum. Eisini bleiv stuðla við lagkøkum, sum blivu seldar saman við einum kaffi- ella tekoppi.
Nógv stóðu klár, tá loppumarknaðurin byrjaði kl. 13.00. Tað bleiv selt til kl. 16.00, og mong brúktu eisini møguleikan at keypa sær ein kaffimunn. Møguleiki var at keypa lagkøku, vaflur og ymiskt annað gott til góman.

Alt bleiv ikki selt, men okkurt er blivið selt á Rótikassanum síðani loppumarknaðin.
Endamálið var sum sagt at samla pening inn til SIMBA-arbeiðið, og tá tað alt er blivið talt saman, vóru innsamlað einar 10.300kr. Tað eru vit sera takksom fyri og takka hjartaliga øllum teimum, sum á ymsan hátt stuðlaðu, bæði við lutum og við at hjálpa til í køkinum, við at selja osv.
Hjartaliga takk fyri!

Komandi sunnukvøld kl. 18.00 talar Jóhanna Sofía Hentze, Skopun. Eisini luttekur kvinnubólkur av Argjum við sangi.

Øll eru hjartaliga vælkomin!

Leygardagin 16. mars verður loppumarknaður í Kirkju- og missiónshúsinum á Argjum til frama fyri SIMBA. Umframt sjálvan loppumarknaðin verður ymiskt annað, sum fer at seta sín dám á dagin. Tað verður m.a. møguligt at keypa sær kaffi og kaku fyri ein bíligan penga.
Tey, ið ynskja at lappa loppur, kunnu seta seg í samband við ein av hesum trimum: Jógvan (291232), Katrin (227048) ella Rannvá (520052). So tað er eitt gott høvi at rudda eitt sindur og samstundis stuðla Simba.
Vit fara at selja nógv ymiskt sum t.d. køksting, leikur og prýðislutir. Tó verða eingi klæðir og bøkur til sølu.

Simba er felagsnavnið fyri alt barna- og juniorarbeiðið hjá Heimamissiónini. Á eystur-afrikanska málinum swahili merkir navnið leyva.

Simba vil møta børnunum, har tey eru, og bjóðar ymisk konsept fram, so sum:
• Sunnudagsskúlar og juniorbólkar kring landið
• Tannáringavikuskifti
• Simbalegur fyri børn um summarið
• Wild Life, Sport&Games, tónleika & sanglega fyri tannáringar
• Undirvísing av leiðarum
• Stimbra leiðslunum runt landið

Sjálvt tann, sum hevur verið veikur og deyðsjúkur, kann aftur rætta seg og gerast so frískur og sterkur sum aldri áður, um tað er Harrans vilji. Eisini andaliga ber til at rætta seg eftir eina tíð við veikleika.
Tey andligu stórmennini, sum verða umrødd í 11. kap. í Hebrearabrævinum, teir sum við trúgv vunnu sigur á kongaríkjum, byrgdu munnin á leyvum, sløktu eldsmegi, komust undan svørðseggjum, sjálvt teir høvdu havt sínar veiku løtur.
Eftir sigurin uppi á Karmelsfjalli finna vit profetin Elia veikan og mótfalnan undir einum einiberjarunni, har hann ynskti seg deyðan.
Soleiðis er kanska eisini gingist tær. Tú vart einaferð andaliga frískur og kraftafullur; men nú ert tú veikur og mótleysur. Men eisini tú kanst aftur gerast sterkur, tí um tey gomlu stórmennini stendur skrivað, at teir blivu sterkir aftan á veikleika, ja, veldigir í stríði og fingu fíggindaherar at víkja.
Pætur ápostul hevði sínar veiku løtur, ja so veikur var hann langafríggjanátt, at ein genta fekk hann at falla. Men aftan á játtan, angur og bót gjørdist hann so sterkur, at hann kundi styrkja brøður sínar, soleiðis sum Jesus hevði sagt.
Paulus takkaði Gudi, sum gjørdi hann so sterkan, at hann orkaði alt í Kristi Jesusi.
Eisini tú kanst gerast eitt andans stórmenni við at íklæðast kraft frá tí høga.

Undir krossins merki stóðu gamlir menn.
Undir krossins merki standa hetjur enn.
Skulu vit tá svíkja? Nei, vit standa stinn

Evnið fyri missiónsvikuna í ár var: Gud vil frelsu – hvat vilt tú?
Til hetta hava ymsir talarar verið og borið orðið fram. Evnini hava verið fjølbroytt, sangarar og kór hava fjálgað um møtini, og ein kaffimuður til endans hevur givið høvið til mangt gott prát.
Sunnukvøldið endaði møtirøðin við lokalum kreftum, tá Bergur D. Joensen, prestur, talaði og Argjakórið sang.

Argjakórið samlast hvørt týskvøld, har tey venja nýggjar sangir. Kórið syngur javnan til møti og onnur tiltøk runt í Føroyum.

Um tú ikki hevur havt møguleikan at hoyra møtini og ynskir tað, so kunnu tey hoyrast á heimasíðuna. Tú kemur til upptøkurnar við at trýsta á her!

Vit takka fyri eina góða viku og ynskja, at hon hevur verið til umvending, styrki og endurnýggjan fyri mong.